Украинадағы соғыс. 1-8 наурыз арасында не болды?

Украинадағы соғыс. Қазірге дейін не болды?

• Ресей президенті Владимир Путин Украинаға шабуыл бастағалы 13 күн болды. 7 наурыз таңертең Ресей әскері Николаев қаласын атқылады, Киевте жарылыс даусы естілді, Украинаның басқа қалалары мен ауылдарына да әуеден және жерден шабуыл жасалды.
• Бейбіт тұрғындарды эвакуациялау үшін ұрысты уақытша тоқтату келісімін бұзды деп екі тарап бірін-бірі тағы айыптады. Ресей қорғаныс министрлігі Киев, Мариуполь, Харьков және Сумы қалаларынан гуманитарлық дәліз ашқанын хабарлады. Бірақ бұл жолдар тек Ресей мен Беларусьқа шығады, украин жағы бұл ұсынысты қолдамайтынын айтты.
• Беларусьтегі Беловеж орманында Ресей мен Украина делегациялары келіссөзінің үшінші раунды сәтсіз аяқталды. Ресей талаптары тізімінен «Украинаның денацификациялау» талабы жоғалып кетті.
• Ресей қалалары мен аймақтарының басшылары соғыста сарбаздары мерт болғанын хабарлап жатыр. Көп айғаққа қарамастан, Владимир Путин Украинаға соғысқа мерзімді әскери қызметкерлер мен запастағы жауынгерлер қатысып жатқан жоқ дегенді тағы айтты.
• Украинаға әскери шабуыл басталғалы Ресейден 150-ге тарта журналист кетіп қалды. Басты себеп – іс жүзінде әскери цензура енгізілуі. Күшіне енген заңға сәйкес, Украинадағы соғысты «соғыс» деп атағандар 15 жылға бас бостандығынан айырылады.
• 7 наурызда күні бойы биржалардағы доллар курсы 150 рубль, ал еуро 160 рубль төңірегінде болды. Кешке қарай рубль біршама күшейгенімен, аса қатаң санкцияға іліккен Ресей валютасының қатты құнсызданып жатқаны байқалады. Қазақстанда мемлекеттік мерекеге байланысты доллар саудаға түскен жоқ. Алдыңғы күні бекітілген ресми бағам бойынша, доллардың құны – 503 теңге. Айырбас пункттерінде доллар 511 теңгеден асып кетті.
• Ресей әлемнің 50 елін «дос емес ел» қатарына қосты. ЕҚЫҰ-ның арнайы мониторинг миссиясы Украинадан кетті.
• Әлемнің әр түкпірінде Украинаны қолдаған, соғысқа қарсы митингілер өтіп жатыр. Украин халқына көмек көрсетуші көп.
• Әлемдік компаниялар мен брендтер Ресейдегі жұмысын тоқтатып жатыр. Кинопрокатты Ресей арқылы жүзеге асыратын қазақстандық Kinopark-Kinoplexx кинотеатрлар жүйесі сәуірден бастап жұмысын тоқтатуға мәжбүр екенін хабарлады.

Украина президенті Владимир Зеленскийдің 8 наурыздағы видеомәлімдемесіне қысқа-нұсқа шолу:

• Ресей Украинадағы соғыстың 13 күнінде қаншама әуе техникасынан айырылды. Олар отыз жылда мұншама авиация техникасын жоғалтпаған.
• Әуе шабуылынан қаза болған әрбір адамның өліміне Ресей кінәлі. Бұған Украинаның аспанын жаппай отырған Батыс та жауапты.
• Қоршауда қалған қалалардан украиналықтарды шығарып алу үшін гуманитарлық коридорды құру мақсаты орындалған жоқ.

8 наурыздағы ең маңызды оқиға - атыс жүріп жатқан жерлердегі бейбіт тұрғындарды қауіпсіз жерге көшіру үшін гуманитарлық коридор ашу болмақ. Екі тарап та коридор ашқандарын хабарлап жатыр.

Украина тарабы Сум қаласынан эвакуация басталғанын хабарлады. Әзірге бұл қазірге дейн ашылған жалғыз гуманитарлық коридор. Сум тұрғындары Полтоваға қарай кетіп жатыр.

Украина қарулы күштерінің бас штабы мен Ресей қорғаныс министрлігі таңертең таратқан хабарламаларын оқи отырыңыз.

Украина қарулы күштері:

• Ресейдің әскери әрекеттерді баяулап қалды.
• Киев, Чернигов, Николаев қалаларын қорғау жалғасып жатыр. Елдің оңтүстік шекарасында Украинаның ракетаға қарсы құрылғылары жаудың әуе шабуылдарына тойтарыс берді.
• Харьков, Сум, Чернигов, Киев облыстарында ресейлік әскерилер мародерлікпен, тонаумен айналысып жүр.
• Херсон мен Николаев облыстарында пропагандаға қарсы он психологиялық күрес тобы құрылды.
• Соғыс басталғалы Ресей 12 мың әскериінен айырылды, 303 танкісі, 120 артиллериялық қаруы жойылды.

Ресей қорғаныс министрлігі:

• Киев, Чернигов, Сум, Харьков, Мариупольден гуманитарлық коридор ашылды. Таңғы оннан бастап "тыныштық режимі" енгізілді.
• "ДХР" күштері Мариупольдегі Осавиахим кварталына, "ЛХР" күштері сегіз елдімекенге бақылау орнатты.
• Бір күнде Украинада 158 әскери нысан жойылды, олардың арасында Житомир ауданындағы Озерное аэродромы да бар.
• Украинаның екі МиГ-29 ұшағы мен бір СУ-27 ұшағын атып түсірдік.
• Осы уақытқа дейін Украинаның 2482 әскери нысаны жойылды.

Соғыс уақытында бұл ақпараттарды тәуелсіз дереккөздерден тексеру мүмкін емес.