Алматыдағы митингті ұйымдастырушылардың бірі Дәулет Әбілқасымов:
Путин менмендігінен тығырыққа тірелді. Осы соғысты бастаған – сол. Ол қазір жеңіліп жатыр, идеология жағынан да, әскери жағынан да. Ол енді аяғына дейін баруға тырысады... Біз бұл жерде қандай да бір ұлтқа қарсы емеспіз. Орыстарға не украиндарға қарсы емеспіз. Біз Путинге қарсымыз. Бейбітшілікті қолдаймыз.
Vlast.kz Алматыдағы Украинаны қолдау митингіне 5 мыңға дейін адам жиналды
6 наурызда Алматыда түскі сағат 12-де "Сарыарқа" кинотеатрының артында Украинаны қолдау акциясы басталды. Оған басында шамамен 300 адам жиналған. Азаттық тілшісі барған сайын жиналғандар қарасы көбейіп жатқанын хабарлады. Митинг басталғаннан кейін жарты сағат өткен соң шараға жиналғандар мыңнан асқан.
Жиналғандардың қолында "Соғысқа жол жоқ", "Соғысты тоқтат!" деген қазақ, орыс, ағылшын тілдерде жазылған плакаттар болды.
Vlast.kz сайты жиналған адам саны 3 мыңнан 5 мыңға дейін жетеді деп хабарлады.
Митингінің алдында Қазақстан және Украина әнұрандары айтылды.
Бұған дейін әкімдік аталған митингіні қала орталығындағы Уәлиханов алаңында өткізуге рұқсат бермеген. Билік ол жақта "жол жөндеу жұмыстары жүргізілетінін" айтқан. Сол себепті белсенділер наразылық акциясын орталықтан алшақ жердегі "Сарыарқа" кинотеатрының артында өткізуге мәжбүр болған.
Митинг ұйымдастырушылардың бірі Дәулет Әбілқасымов "бұл митинг Ресей халқы, Украина халқына қарсы емес, Путинге, соғысқа қарсы митинг" деді.
– Путин өз мансапқұмарлығының тұтқынына айналды. Осы соғысты бастаған – сол. Ол қазір жеңіліп жатыр, идеология жағынан да, әскери жағынан да. Ол енді аяғына дейін баруға тырысады... Біз бұл жерде қандай да бір ұлтқа қарсы емеспіз. Орыстарға не украиндарға қарсы емеспіз. Біз Путинге қарсымыз. Бейбітшілікті қолдаймыз, – деді белсенді.
Митингіде сөйлеген кейбір белсенділер "Қазақстан Ресей құрған одақтарға (Еуразия экономикалық одағы, ҰҚШҰ т.с.с - ред.) өз еркімен кірген жоқ, оны Назарбаев референдум өткізбей, халықпен ақылдаспай кіргізді. Одан шығуды талап етеміз" деді.
Құқық қорғаушы Ғалым Ағелеуов украин халқы жылдар бойы әділ сайлау, митингіге шығу сияқты азаматтық құқықтары үшін күресіп, соған қол жеткізді. Қазір де украиналықтар туған елінің әрбір сүйем жері үшін күресіп жатыр деді.
Шымкентте Украинаны қолдауға шыққан белсендіні полиция ұстап әкетті
6 наурыз күні Шымкент қаласы әкімдігінің алдына Украинаны қолдайтынын айтып келген белсенді Ермек Қонышбаевты полиция ұстап әкетті. Белсендіні не себепті ұстағаны жөнінде полициядан түсініктеме алу мүмкін болмады.
Жексенбі күні күндіз Алматыда бірнеше мың адам қатысқан Украинаны қолдау митингісі өтіп жатқан кезде Ермек Қонышбаев Шымкент әкімдігі алдындағы алаңға Ресейдің Украинаға басқыншық әрекетіне қарсылық білдіру үшін барған. Шамамен жарты сағаттан соң оны полиция күшпен ұстаған. Ол бұл жөнінде Facebook парақшасында тікелей эфирде хабарлап үлгерді.
Полициядан белсендіні не себепті ұстағаны жөнінде ақпарат алу мүмкін болмады.
Бұдан бөлек 6 наурызда Шымкентте белсенді Оралбай Біләловтің үйін полиция күзетіп тұрғаны хабарланды. Біләлов үйін күзеткен полицейлерге “соғысқа қарсылығын айту үшін шығатыны” айтқан. Бірақ полиция оны үйінен шығармаған.
Жексенбі күні белсенділер түсте қала әкімдігіне барып, Украинаны қолдайтынын айтпақ болған. Бірақ қалада қандай да бір митингінің болғаны жөнінде ақпарат жоқ. Әкімдік маңында полиция күзеті күшейді.
Алматыда "Сарыарқа" кинотеатрының алдында өткен Украинаны қолдау митингісіне бірнеше мың адам жиналды. Митингіде сөйлегендер Украинаға басып кірген Ресейдің агрессиясын айыптап, Қазақстан Ресей құрған одақ, ұйымдардың барлығынан шығуы тиіс деді.
Ресей президенті Владимир Путин 24 ақпанда Украинаға әскерін кіргізіп, түрлі нысандарды атқылай бастаған. Содан бері мыңдаған адам опат болды, 1,2 млн адам өзге елдерге босып кетті. Қаза болғандар арасында бейбіт тұрғындар бар.
Батыс елдері Кремльдің әрекетін қатаң айыптап, санкция салды. Украинадағы әскери қылмыс бойынша халықаралық дәрежеде зерттеу басталды.
Украина қарулы күштерінің бас штабы: 24 ақпаннан бері Ресейдің 11 мың әскери қызметкері қаза тапты
ПІКІРЛЕР