Азаттықтың Орыс қызметі Ресейдегі қызметін тоқтатты
Азат Еуропа/Азаттық радиосы Ресейдегі бюросының қызметін тоқтатты. 4 наурыз күні Ресей федералды салық қызметі Мәскеудегі арбитраж сотына жүгініп, бюроны мәжбүрлі түрде банкрот деп жариялауды талап етті. Кейінгі уақытта бюро қызметкерлеріне қысым күшейе түскен.
Медиакорпорация басшылығының айтуынша, бұл қадам Ресей билігінің Азаттық радиосына қарсы көп жылғы науқанының шарықтау шегі болып отыр. Мәскеудегі бюро 1991 жылы елдің сол кездегі президенті Борис Ельциннің шақыруымен ашылған.
Владимир Путин 4 наурыз күні қол қойған заң журналистерге қауіп төндіреді. Бұл заң аясында "Ресей әскері туралы жалған ақпарат" таратты деген адам 15 жылға дейін бас бостандығынан айырылуы мүмкін. Ал Мәскеу Ресейдің Украинаның басқыншылығын "соғыс" емес, "әскери операция" деп атап, бұған баспасөз құралдарын қудалауға көшкен. Ал жаңа заң аясында Украинадағы жағдайды "соғыс" деп атау қылмыстық жауапкершілікке әкелуі мүмкін. Сол себепті Азаттық радиосы Мәскеудегі бюросын жауып, Ресей туралы хабарды шетелден таратуға көшеді. Медиакорпорацияның баспасөз хабарламасында осылай жазылған.
"Азат Еуропа/Азаттық радиосының бұл шешімі мәжбүрлі түрде жасалды. Оған Путин режимінің шындыққа шабуылы түрткі болды. Ресей билігі азаматтарды Кремльдің Украинаға қарсы соғысы туралы шындықты білу мүмкіндігінен айыруға жан таласа отырып әділ журналистерді отанының сатқыны деп жариялап отыр. Біз қолда бар мүмкіндікті пайдалана отырып, аудиториямызға Ресейдегі оқиғалар туралы ақпаратты беруді жалғастыра береміз. Жағдай ауыр. Бірақ 70 жылдық тәжірибемізге сенсек, Ресейдегі тілшілер қосынын қайта ашатын мүмкіндік туады және ол көп күттірмеуі де ықтимал. Уақыт еркіндік жағында, Путиннің Ресейі үшін де" деді корпорация президенті Джейми Флай.
Өткен аптада Ресей аумағында Азаттық радиосы Орыс қызметінің 9 сайты бұғатталды. Оның ішінде Орыс қызметі, Татар-бәшкір қызметі, Север.реалии жобасы, "Настоящее время" телеарнасы да бар. Роскомнадзор оларды Ресейдің Украинадағы басқыншылық соғысы туралы ақпаратты өшіруден бас тартқаны үшін бұғаттады. Билік органы мұндай шараны өзге де тәуелсіз ақпарат құралдарына қолданды. Олардың арасында жергілікті және шетелдік БАҚ бар. Ресейліктер үшін Facebook пен Twitter де жабылды.
Орыс қызметінің банкрот деп жариялануына формалды себеп – компанияның Ресей үкіметі салған айыппұлды төлеуден бас тартуы. Мәскеу Азаттықтың Орыс қызметін "шетел агенттері" тізіміне қосқан. Ресей заңы бойынша, бұл тізімге кірген ақпарат құралдары әрбір журналистік материалының алдында "шетел агенті" екенін ескертіп отыруы керек. Медиа компания бұл талапты әділетсіз әрі заңдық негізі жоқ деп санап, оны орындаудан бас тартты. Роскомнадзор 2021 жылғы қаңтардан бері Азаттық бюросына 13 миллион доллар айыппұл салып, Орыс қызметіне жұмыс істейтін 18 журналисті "шетел агенті" тізіміне жеке тұлға ретінде кіргізді.
БҰҰ: Кейінгі 10 күнде Украинадан 1,5 миллион босқын қашқан
"Кейінгі 10 күнде Украинада көрші елдерге 1,5 миллион босқын өткен. Бұл – Екінші дүниежүзілік соғыстан бері Еуропадағы ең жылдам үдеп бара жатқан миграция дағдарысы" деді БҰҰ босқындар жөніндегі жоғарғы комиссары Филиппо Гранди.
Өзбекстан арнайы қызметі Украинадағы соғыс туралы "дұрыс ақпарат таратпаған" журналистерді шақыра бастады
Өзбекстанда мемлекеттік БАҚ Украинадағы соғыс туралы ақпараттарды өте сирек таратып жатыр. Ал Ресей басқыншылығы туралы жазған журналистер мен блогерлер биліктің қысымына ұшырады.
Азаттықтың Өзбек қызметінің хабарлауынша, өткен демалыс күндері бірнеше журналист пен блогер Мемлекеттік қауіпсіздік қызметінің тергеу бөліміне шақырылған. Оларға "Украинадағы оқиғалар туралы мақалалардың салдары" жөнінде ескерту берілген.
Аты-жөнін атамауды өтінген блогерлердің бірі"Озодлик" радиосына өзін Ташкентте 28 ақпанда "тергеуге" шақырғанын айтты. Оның сөзіне қарағанда, "әңгіме" кезінде арнайы қызмет өкілдері одан Украина жөнінде "өте бейтарап және салмақты" ақпарат таратуды талап еткен.
– Олар маған "бұл өте сезімтал тақырып, сол себепті оқиғалардан ақпарат таратқан кезде өте бейтарап болыңыз" деді, - дейді блогерлердің бірі.
Оған дейін де бірнеше блогер мен журналист әлеуметтік желіде өздерін арнайы қызметке шақырғанын хабарлаған.
26 ақпанда Өзбекстанда танымал Kun.uz интернет-басылымының бас редакторы мен екі құрылтайшысы тергеуге шақырылған. Бұл жөнінде Facebook'те басылым құрылтайшылырының бірі Умид Шермұхаммедов хабарлады.
"Негізі бармаймын деп ойлағанмын, бірақ олар біздің бір тілшіні, орынбасарымызды, сосын әріптесімізді шақырды, енді мені де "асыға күтіп отырған" көрінеді. Олар Украинаны сылтауратып, мені тағы қыспаққа алмақшы" деді Шермұхамедов.
Шермұхамедов те, Kun.uz сайтының өзге құрылтайшылары да әзірге тергеуде не болғанын айтпады. Біраз уақыттан соң Умид Шермұхаммедов Facebook'тағы жазбасын өшірді. Азаттықтың дереккөзінің хабарлауынша, тергеу кезінде интернет-басылым басшылығына Украинадағы жағдай туралы хабар таратуына байланысты ескерту берілген.
Қазір өзбекстандық бірқатар сайттардан Ресейдің Украинаға шабуылдағаны жөнінде мақалалар жоғалып кеткен.
Азаттық президент жанындағы Ақпарат және қоғамдық коммуникация агенттігіне хабарласқанмен түсініктеме ала алмады.
Ресей Украинаға 24 ақпанда басып кірген. Содан бері он күннен астам уақыт өтсе де, Өзбекстан басшысы президент Шавкат Мирзияев та, Өзбекстан СІМ де реакция білдірмеген.
Владимир Зеленский 6 наурыздағы видео үндеуінде Ресей Украина қалалары мен бейбіт тұрғындарды бомбалауды алдын ала жоспарлаған деді. Ол бұл сөзін тұтқынға түскен әскерилердің құжаттарына сілтеп айтып отырғанын мәлімдеді.
Зеленский сондай-ақ Ресей халқына жүгінді: "Егер қазір үнсіз қалсаңыздар, алда сіздер үшін кедейліктеріңіз сөйлейді. Ал оған тек репрессиямен жауап береді. Үнсіз қалмаңыздар.
Украина президенті сонымен Ресей әскерінің Одессаны бомбалауға дайындалып жатқанын айтты. "Бұл әскери және тарихи қылмыс болмақ" деді ол.
ПІКІРЛЕР