Ресми Нұр-Сұлтан: Ұлыбритания Қазақстанға санкция салуға ниетті емес
Ресейдің Украинаға қатысты әрекетіне байланысты Ұлыбритания Қазақстанға санкция салмайды. 5 наурызда Қазақстан СІМ осылай деп хабарлады.
Ресейдің Украинаға басқыншылығы жалғасып жатқан тұста британ парламентінің мүшесі Маргарет Ходж 1 наурызда Мәскеу ғана емес, Ресей басшысы Владимир Путинді қолдап отырған Қазақстан мен Әзербайжанға да шектеу қою қажеттін айтқан еді. Оның мәлімдемесіне жауап берген Ұлыбритания сыртқы істер министрі Элизабет Трасс Нұр-Сұлтан мен Бакуға санкция салу мәселесін қарастырып жатқанын, дегенмен қазір Лондон негізінен Ресей мен Беларусьтің Украинаға агрессиясына төтеп беруге көбірек ден қойып жатқанын айтқан.
Қазақстан сыртқы істер министрлігінің хабарлауынша, министр орынбасары Роман Василенко Ұлыбританияның Орталық және Оңтүстік Азия, Солтүстік Африка істері жөніндегі мемлекеттік министрі Тарик Ахмадпен видео кездесіп, Ұлыбританияның Қазақстандағы елшісі Кэти Личті қабылдаған. 5 наурыздағы ресми хабарламада тараптардың Украинадағы жағдайды талқылағаны жазылған.
"Британ тарабы Ресейдің Украинадағы әскери операциясына байланысты Қазақстанға қатысты қандай да бір санкция енгізуге ниетті емес екенін растады. Кездесу қорытындысы бойынша талқыланған тақырыптардың барлық спектрі бойынша толық өзара түсіністік расталды және екіжақты қатынастарды одан әрі белсенді және жан-жақты дамытуға өзара дайындық білдірілді" деп жазылған хабарламада.
Наурыздың басында британ парламентінде Қазақстанға санкция салу ұсынысы айтылғаннан кейін Ұлыбританияның Қазақстандағы елшісі сыртқы істер министрлігіне шақырылғаны хабарланған. Ведомство өкілдері мен елші арасындағы кездесу жөнінде толық ақпарат шықпады.
Британ парламентінде Қазақстан билігіне санкция салу мәселесін қозғаған лейбористік партия мүшесі Маргарет Ходж ақпан айында британ парламентінде өткен "Қазақстан: жемқорлыққа қарсы санкциялар" атты талқылау кезінде британ үкіметін "халықты тонап, байыған" Қазақстан элитасы өкілдеріне санкция салуға үндеген еді. Ол ондаған адамның аты-жөнін атаған. Басым бөлігі бұрынғы президент Нұрсұлтан Назарбаевтың отбасы мен оның айналасындағы адамдар. Ходж сол кезде Ұлыбритания билігін "жемқорлыққа көз жұма қарап, Қазақстан режиміне лас ақшаны жымқырып, жұмсауына көмектесті" деп кінәлаған болатын.
Қазақстанда көптеген белсенді Батыс елдерін елде адам құқығының өрескел тапталуына жауапты шенділерге, "халықтың есебінен" байыған тұлғаларға санкция салуға жиі шақырып келеді.
Ресей билігі Украинаның кемінде екі қаласында атыстың уақытша тоқтағанын хабарлады
Ресей қорғаныс министрлігі Украинаның кемінде екі қаласында: Мариуполь және Волновахада бейбіт тұрғындар гуманитарлық дәліз арқылы қаладан шығу үшін атысты ішінара тоқтату туралы бұйрық шығарды. Бұл жөнінде Ресей мемлекеттік ақпарат құралдары жазды.
Ақпаратқа қарағанда, гуманитарлық өткел мен шығу жолдары Украина тарабымен үйлестірілген.
Ресей қорғаныс министрлігінің хабарлауынша, атыс бойынша үзіліс 5 наурыз Мәскеу уақытымен таңертеңгі сағат 10, Киев уақыты бойынша таңертеңгі 7-де басталады.
Елдің оңтүстігіндегі аталған екі қалада Ресей әскері қаруын қойды ма, жоқ па, ол жағын Азаттық растай алмады.
Ресей президенті Владимир Путин 24 ақпанда Украинаға әскерін кіргізіп, түрлі нысандарды атқылай бастаған. Содан бері мыңдаған адам опат болды, 1,2 млн адам өзге елдерге босып кетті. Қаза болғандар арасында бейбіт тұрғындар бар.
Ресей ақпарат құралдарының жазуынша, қорғаныс министрлігі 5 наурызда Ресей әскерінің шабуылы жалғасып жатқанын хабарлаған.
Мариуполь Азов теңізі жағалауында орналасқан 400 мың адам тұратын стратегиялық маңызы бар қала. Мұнда бірнеше күннен бері ауыз су мен жылу жүйесі жоқ.
Мариуполь мэрі Вадим Бойченко Телеграм арнасында атысты уақытша тоқтату "жылу, жарық, мобильді байланыс сияқты қаланың ең маңызды инфрақұрылымдарын қайта жөндеуге мүмкіндік береді. Бұған қоса, Мариупольді азық-түлік және дәрі-дәрмекпен қамтамасыз етуге жол ашады" деді.
Украина мен халықаралық ұйымдардың Ресейді әскери қылмыс жасады деп айыптауы және бейбіт тұрғындарға шабуылы жайлы ақпараттар кейінгі күндері үдеген. Себебі Украинада тұрғын үйлер мен азаматтық нысандардың қирағаны жөнінде суреттер көп. Ал жергілікті билік жарық пен суды өшіретінін ескерткен.
Ресейдің Украинаға басқыншылығы кезінде қолданылған Z және V таңбалары Байқоңырда пайда болды
Украинаға басып кірген кезде Ресей әскері қолданған Z және V таңбалары Ресей Қазақстаннан жалға алған Байқоңыр айлағында пайда болды. "Роскосмос" басшысы Дмитрий Рогозин Twitter'де "Байқоңыр қарулы күштеріміздің әрекетін қолдайды" деп жазып қойған.
Қазақстан үкіметі Рогозиннің жазбасына реакция білдірмеді.
Ресми Нұр-Сұлтан одақтасы әрі экономикалық әріптесі Ресейдің әрекетін айыптамаған. Қазақстан президенті Қасым-Жомарт Тоқаев Ресей Украинаға басып кіргеннен кейін бір аптадан соң Киев пен Мәскеуді келісімге келуге үндеген. Ақорда Тоқаевтың Ресей басшысы Владимир Путинмен, Украина президенті Владимир Зеленскиймен де телефон арқылы сөйлескенін хабарлаған. Әңгіменің жай-жапсары белгісіз.
Нұр-Сұлтан Ресейдің Украинаға шабуылына байланысты пікір айтуда сақтық танытып отырған шақта бірқатар қазақстандықтар соғысқа қарсы акцияларға шығып, украиналықтарға гуманитарлық көмек жинады.
Осыған дейін Қазақстанда бірқатар азаматтар көлігінің терезелеріне Z және V белгілерін жапсырып алған жүргізушілерді жауапқа тартуға шақырған. Бұл таңба елде Ресей басқыншылығын қолдаудың белгісі болып саналады. Алматы полициясы осындай таңба жапсырып алған көліктерді тексеріп жатқанын хабарлаған.
Мәскеу Қызылорда облысындағы Байқоңыр айлағын 2050 жылға дейін жалға алған. Осы уақыт аралығында Байқоңыр Ресейдегі федералдық маңызы бар қала санатына ие болады.
Келісім-шарт бойынша, Ресей ай сайын Қазақстанға 115 млн доллар төлеуі тиіс. Кейінгі жылдары Байқоңырдан ұшатын зымырындар азайған. Сарапшылардың айтуынша, бұл ғарыш нарығында Мәскеу үлесінің азаюымен және бірінші кезекте америкалық SpaceX компаниясымен бәсекеге түсуімен байланысты. SpaceX өте ауыр Falcon зымырандарын бірнеше рет пайдалану амалын тауып, ұшыру құнын едәуір азайтқан, осылайша Роскосмос секілді бәсекелестерін нарықтан ысырған.
Ресей тағы да оншақты басылымды бұғаттады, арасында Азаттық радиосының жобалары бар
Ресейдің Роскомнадзор мекемесі Бас прокуратураның талабы бойынша, интернетте ақпарат тарататын тағы да он шақты басылымды бұғаттады. Арасында Азат Еуропа / Азаттық радиосының жобалары: Север.Реалии, Сибирь.Реалии, Кавказ.Реалии, Idel.Реалии, Фактограф, Маршо Радио және Азатлык сайттары бар. Бұғатталған сайттар тізімін "Роскомсвобода" құқық қорғау жобасы сайтында жариялаған.
Бұғатталған сайттар арасында "Засекин" (Самара), "Протокол" және "Голос Кубани" (Кубань) ресейлік аймақтық басылымдар бар.
Новосибирсктегі NGS басылымы өзі қарайтын қалалық порталдар желісінің редакциялық директоры Ольга Прохорованың оқырмандарға мәлімдемесін жариялаған.Онда директор холдингке кіретін басылымдардың Украинадағы соғыс жайлы жазуды доғаратынын хабарлаған.
"Қалыптасып отырған жағдайда арнаулы операцияға тікелей қатысы бар ақпараттан бас тартуға мәжбүрміз. Бұған қоса осы тақырыптағы материалдарға комментарий жазуды шектейміз, мұны сіздің де қауіпсіздігіңізді ойлап жасап отырмыз" деп мәлімдеді Прохорова.
Новосибирск қалалық порталдар желісіне қырықтан астам медиа кіреді. Олардың арасында Новосибирскінің NGS.ru, Красноярскінің NGS24.ru, Екатеринбургтің E1.ru басылымдары бар.
Ресейдің Украинаға шапқыншылығы жайлы жазуды доғару туралы дәл осындай шешімді "Тайга.инфо", красноярскілік "Проспект мира" және "Борус" телеграм-каналы, "Адвокатская улица" басылымы мен "Ведомости" газетінің бұрынғы қызметкерлері ашқан VPost сайты да қабылдаған.
Colta.ru басылымы "дәл қазір пікір айту еркіндігі толық жойылғандықтан, мұндай жағдайда ең адалы – уақытша тіс жармай отыру деген шешімге келгенін айтады.
Бұған дейін Ресей президенті Владимир Путин "Ресей армиясы жайлы жалған ақпарат" таратқандарды 15 жыл мерзімге дейін түрмеге қамау туралы заңға қол қойған. Осыдан кейін ресейлік медиа құралдарының көбі қызметін доғаратынын мәлімдеді. Былтыр бас редакторы Нобель бейбітшілік сыйлығын алған "Новая газета" басылымы Ресейдің Украинаға басқыншылығы туралы материалдарды сайттан алып тастау жайлы шешім қабылдаған.
Батыс ақпарат құралдары Ресейдегі жұмысын тоқтата тұруды ұйғарды.
ПІКІРЛЕР