"Настоящее время" Ресей азаматтарына Украинадағы бейбіт елдімекендердің қалай бомбаланғанын бейнелейтін суреттерді көрсетті. Реакциясын көріңіз:
"Ұлымды соғысқа емес, әскерге жібердім". Украинада тұтқынға түскен ресейлік жауынгерлердің аналарының талабы
Ресей мен Украина арасындағы соғыста қолға түскен ресейлік жауынгерлердің аналары ұлдарының басқа елде тұтқында жатқанын интернетте тараған видеолардан білген. Олар Ресей билігі балаларын соғысқа жіберетінін жасырып, енді тұтқындағы жауынгерлерді босатып алуға құлықсыздық танытып отырғанын айтады. Ұлының тағдырына алаңдаған аналар қазір кімнен жәрдем сұрарын білмей, шарасыз күйде отыр.
Ресейдің Украинаға қарсы соғыс ашқанына бір аптадан асты. 2 наурызда Ресей қорғаныс министрлігі соғыс басталғалы алғаш рет өз әскеріндегі адам шығынын жариялап, 498 жауынгер қаза тауып, 1957 адам жараланғанын мәлімдеді. Украина билігі болса "Ресейдің 6 мыңға жуық сарбазының көзі жойылды" дейді.
Кейінгі кездері тұтқынға түскен ресейлік жауынгерлер туралы ақпараттар мен видеолар желіде көп тарай бастады. Олардың арасында Отан алдындағы борышын өтеуге кетіп, соғыс ортасынан бір-ақ шыққан өрімдей жас көп. Сибирь.Реалии сайты тұтқынға түскен жауынгерлердің аналарын тауып сөйлесті. Аналар мемлекеттің жастарды алдап, соғысқа жұмсағаны, Украинаға көзқарасы және ұлдарын елге қайтару үшін күресі туралы әңгімеледі.
Толығырақ Азаттық мақаласынан оқи отырыңыздар.
Алматы әкімдігі кәсіпкер Болат Әбіловке Украинадағы соғысты тоқтатуды талап ететін митинг өткізуіне рұқсат бермеді
Бұл жөнінде кәсіпкердің өзі Азаттыққа хабарлады.
Кәсіпкер митингіні 5 наурыз түскі сағат 12 мен 13:30 аралығында Шоқан Уәлиханов атындағы алаңда өткізгісі келген. Ал әкімдіктің кәсіпкерге берген жауабында 5-7 наурыз аралығында ол жерде "жоспардан тыс жөндеу-монтаж жұмыстары жүргізілетіні" жазылған. Әкімдік өтініш иесіне балама орын ретінде қала орталығынан алшақта орналасқан "Сарыарқа" кинотеатрының артын ұсынған. Бірақ кәсіпкер ұсыныспен келіспейді.
"Билік митингінің адам аз жиналатын алаңда болғанын қалайды, бірақ ол жақта мен өткізбеймін. Келесі аптада тағы өтініш беремін" деді Әбілов.
Роскомнадзор Ресейде Азаттық радиосы/Азат Еуропа сайтын бұғаттады. Азаттықтан бөлек "Америка дауысы", "Медуза", ВВС, Deutsche Welle сайтының да жұмысын шектеді. Ресей бұл басылымдар "Украинадағы арнайы әскери операция жайлы, әскери әрекеттер жайлы (бейбіт тұрғындарға, азаматтық инфраструктураға шабуыл), ресейлік әскерилердің шығыны туралы жалған ақпарат таратты" дейді.
Кремль бұған дейін осындай желеумен "Настоящее время", "Дождь", "Крым. Реалий", "Эхо Москвы" сайттарын да бұғаттап тастаған.
Бұл медиалардың барлығы Ресейдің Украинаға басқыншылығын "соғыс" деп атап, тәуелсіз ақпарат таратып келген.
ПІКІРЛЕР