Ресей аумағында "Медуза", британиялық BBC, Facebook және Twitter, Азаттықтың Орыс қызметі, "Неміс толқыны" (Deutsche Welle) сайттары ашылмай қалды.
Запорожье облысы әскери әкімшілігінің басшысы Александр Старух Запорожье АЭС-нің директорына сілтей отырып станция блоктарының жарылу қаупі жоқ деді.
"ЗАЭС директоры объектінің ядролық қауіпсіздігі қамтамасыз етілді" деді Старух.
Осыған дейін ол: "ЗАЭС жетекшісінің мәліметінше, оқу корпусының ғимараты, зертханалық-тұрмыстық корпус өртеніп жатыр. Қуанышқа орай, әкімшілік корпус бүлінсе де, өртке оранбаған" деген.
Ұлыбритания үкіметі басшысының баспасөз қызметі премьер Борис Джонсонның Зеленскиймен сөйлескенін мәлімдеді: Ұлыбритания ЗАЭС-тің атқылануына байланысты шұғыл түрде БҰҰ Қауіпсіздік кеңесінің жиналысын шақырып отыр.
"Президент Путиннің есерсоқ әрекеті енді Еуропа қауіпсіздігіне тікелей қауіп төндіріп отыр" делінген баспасөз хабарламасында.
Украина президенті Владимир Зеленский АҚШ президенті Джо Байденмен телефон арқылы сөйлесіп, Запорожье атом электр станциясындағы ахуалды талқылады. Президент Байден бұл мәселе жөнінде АҚШ-тың ядролық қауіпсіздік жөніндегі министрінің орынбасарымен сөйлесті.
ПІКІРЛЕР